Në selinë e Bashkimit Afrikan, Bill Gates njofton se do të mbështesë ndjeshëm projektet shëndetësore dhe bujqësore në Afrikë përmes fondacionit të tij, i cili do të përdorë gjithashtu inteligjencën artificiale.
Me rastin e 25-vjetorit të themelimit të tij, miliarderi i famshëm amerikan Bill Gates kritikoi uljen e buxheteve të shëndetësisë në shumë vende afrikane në një konferencë të Bashkimit Afrikan në Addis Ababa javën e kaluar – e cila është shkaktuar kryesisht nga borxhi i lartë shtetëror dhe shkurtimet dhe mohimi i ndihmës ndërkombëtare.
Një goditje veçanërisht e rëndë, tha ai, është tërheqja e Shteteve të Bashkuara nga bashkëpunimi ndërkombëtar i zhvillimit: USAID deri vonë investonte rreth 50 miliardë dollarë në vit në projekte ndihme. Shkurtimet masive, të cilat prekin rreth 83 përqind të programeve të zhvillimit në mbarë botën, kanë çuar tashmë në ndërprerjen e projekteve të rëndësishme për të mbështetur shëndetësinë dhe bujqësinë në Afrikë, ndaj Gates tha: “Këto shkurtime janë një gabim i madh.”
Gates njoftoi se dëshiron të përdorë fondacionin e tij për të mbushur boshllëqet, veçanërisht në sektorin e shëndetësisë – megjithëse ka frikë se vdekshmëria foshnjore në Afrikë mund të rritet përsëri në vitet e ardhshme.
Pothuajse e gjithë pasuria për fondacionin
Fokusi i angazhimit të Fondacionit Bill Gates mbetet lufta kundër AIDS-it, malaries dhe tuberkulozit në Afrikë. Gates ka konfirmuar se planifikon të dhurojë pothuajse të gjithë pasurinë e tij – e vlerësuar në rreth 200 miliardë dollarë – për kauza humanitare.
Ai planifikon të mbajë vetëm një përqind të asaj pasurie për vete. Qëllimi është që këto para të shpenzohen gjatë dy dekadave të ardhshme, kryesisht për të mbështetur sistemin e kujdesit shëndetësor të Afrikës.
Midis imazhit të një bamirësi dhe instinktit për pushtet
Pavarësisht performancës së tij filantropike, Gates po përballet me kritika në të gjithë botën – dhe gjithnjë e më shumë në Afrikë. Vëzhguesit e kritikojnë atë për zgjerimin e ndikimit të tij ekonomik dhe politik nën maskën e patronazhit dhe bamirësisë.
Gazetari amerikan Tim Schwab, autor i librit “Problemi me Bill Gates”, e sheh Gates si një përfaqësues të “filantrokapitalizmit” – një formë bamirësie që është e lidhur ngushtë me interesat e veta ekonomike. Bill Gates dhe miliarderë të tjerë të teknologjisë përdorin filantropinë për të fituar pushtet dhe për të formësuar botën sipas vizioneve të tyre.
Milionat e Bill Gates për një kompani gjermane bioteknologjike
Një dokumentar i DW i vitit 2022 tregon se si Fondacioni Bill & Melinda Gates është zhvilluar në promovuesin më të rëndësishëm të teknologjisë së modifikuar gjenetikisht në Afrikë.
Duke financuar eksperimente me teknologji gjenetike atje, Fondacioni Gates dyshohet se po luan në duart e korporatave të mëdha perëndimore të agrobiznesit.
Zëra kritikë edhe nga Afrika
Ka edhe kritikë të Bill Gates në Afrikë. Eksperti i shëndetësisë nga Angola, Domingos Cristóvão, paralajmëron për rrezikun e varësisë së vendeve afrikane nga fondacionet private në sektorë kyç si shëndetësia: “Vendet afrikane duhet të ndërtojnë strukturat e tyre të qëndrueshme shëndetësore – pa u mbështetur në donatorë të huaj.”
Fokusi i ri i Fondacionit Gates në Afrikë supozohet të jetë përdorimi i inteligjencës artificiale (IA) për të modernizuar sistemet shëndetësore në vendet afrikane. Gates sheh në këtë një mundësi të shkëlqyer për efikasitet dhe akses më të madh në kujdesin shëndetësor.
Lidhur me këtë temë, Cristóvão është i hapur. “Vendet afrikane deri më tani kanë pasur akses shumë të kufizuar në teknologjitë e IA-së. Këtu mbështetja e synuar mund të ketë kuptim.” Megjithatë, ai thekson rëndësinë e strategjive të veta:
“Ne duhet ta dimë vetë se çfarë na nevojitet – dhe nuk duhet t’i lejojmë të tjerët të na imponojnë prioritetet tona.” /tesheshi.com/
