Natyrisht që nuk bëhet fjalë për “Betejën e Ujit të Rëndë” që do t’i jepte mundësinë Hitlerit të ndërtonte bombën bërthamore.
Por për një betejë që ka nisur prej 21 qershorit dhe ndoshta përpara tij (në fakt tesheshi.com e ka shkruar që prej gushtit).
Sasia e madhe e parave që qarkullon kjo ndërmarrje e madhe dhe numri i konsiderueshëm i punonjësve, rreth 1 mijë, e kthyen UKT-në në një përplasje të fortë mes PS-së dhe LSI-së që në 2013-n, por beteja finale ka nisur pas 21 qershorit.
Madje edhe me “bombardime” të fuqishme siç ishte ai i dy ditëve të fundit kur kryeqyteti u paralizuar nga mungesa e ujit.
Ujësjellësi i Tiranës apo UKT, është një ndërmarrje që administrohet nga dy institucione: Ministria e Transporteve dhe Infrastrukturës dhe Bashkia e Tiranës.
I vetmi trust i rëndësishëm ekonomik në Shqipëri që mbeti pa lëvizur pas 23 qershorit 2013, ishte pikërisht Ujësjellësi i Tiranës. Në krye të tij është një zyrtar i emëruar nga Lulzim Basha në 2011-n, edhe pse pronari i kësaj ndërmarrje është ligjërisht ende Ministria e Transporteve. Me një fjalë është një “ndërmarrje e përbashkët” mes PD-së dhe LSI-së.
Drejtori i UKT-së, Fatbardh Islamaj, është një zyrtar i emëruar nga Basha dhe, por kur PS-ja ishte në opozitë, emëriminn e tij e cilësoi si nepotik, duke thënë se ai është i vëllai i kreut të gjykatës së Tiranës, për të cilin opozita e asaj kohe theksonte se është i afërm i ish-Kryeministrit Berisha.
Mirëpo ky lidership ka bashkëjetuar mirë me LSI-në, madje Meta ka punësuar një numër të konsiderueshëm punonjësisht gjatë fushatës së 21 qershorit nga zona që sot i përket bashkisë së madhe së Vorës, në mënyrë që të arrinte objektivin më të madh të fushatës për zgjedhjet lokale.
Me të fituar zgjedhjet e 21 qershorit, kreu i bashkisë së Tiranës, Erjon Veliaj, i kërkoi drejtorit të UKT-së të japë dorëheqjen, por deri më sot ai nuk e ka pranuar. Dhe siç mësohet, vetë Veliaj sot nuk e shkarkon dot pasi i duhet edhe “vota” e Ministrit të Transporteve dhe Infrastrukturës, Edmond Haxhinasto, një eksponent i LSI-së.
Vetë Haxhinasto, normalisht i nxitur nga Rama, një vit më parë bëri një deklaratë televizive se do të kryejë një reformë të thellë në fushën e ujësjellësave, por më pas u kërkoi televizioneve dhe portaleve që ta hiqnin deklaratën, pasi mori mallkime të fuqishme nga lidershipi i partisë së tij, Ilir Meta.
Edhe Rama e rimori këtë deklaratë gjatë fushatës duke theksuar se do ta bëjnë zhvendosjen e ujësjellësave tek bashkitë e mëdha. Kurse në Tiranë, ende nuk është përfunduar.
Megjithatë, duke iu referuar Ramës, të gjithë e dinë se Erjon Veliaj, pra kryebashkiaku, është fuqiplotë në UKT-në që nuk lëviz dot as drejtorin.
Kriza e dy ditëve me mungesë uji deri dhe në spitale, ishte një “bombë” më shume se sociale, por mund të jetë një “eksploziv politik” që do të përdoret për manovrat e përplasjes ndaj atyre që Meta i cilësoi si “sulmues të imazhit politik të LSI-së” ./tesheshi.com/
