Komisioni Evropian njoftoi se ka ngritur një padi kundër Hungarisë në Gjykatën e Drejtësisë të Bashkimit Evropian për një rregullore që lejon lirimin e kontrabandistëve të emigrantëve.
Qeveria hungareze, e udhëhequr nga kryeministri Viktor Orban, miratoi një dekret në prill 2023 që lejoi qindra kontrabandistë të dënuar të liroheshin nga burgu me kusht që të deportoheshin dhe të kryenin pjesën tjetër të dënimit në vendin e tyre të origjinës. Ky vendim u paraqit si një zgjidhje për mbipopullimin e burgjeve dhe pjesë e masave shtrënguese, por u perceptua edhe si një sfidë për politikën evropiane ndaj migrantëve.
Komisioni Evropian e ka kritikuar disa herë, duke pretenduar se ligji nuk parashikon asnjë masë për të siguruar që kontrabandistët e migrantëve të vuajnë dënimet e tyre jashtë Hungarisë.
Hungaria nën Orbanin ka zbatuar një politikë të rreptë ndaj migracionit të paligjshëm, për të cilën Gjykata e BE-së e ka ndëshkuar disa herë.
Në qershor të vitit 2024, Budapesti u dënua me një gjobë rekord prej 200 milionë eurosh dhe një gjobë prej një milion eurosh në ditë për mosrespektimin e ligjit të BE-së për azilin.
BE-ja ka ngrirë disa miliardë euro fonde evropiane për Hungarinë, si pjesë e procedurave të ndryshme mbi të drejtat e personave LGBT+, azilkërkuesve, prokurimit publik dhe konflikteve të interesit. /tesheshi.com/
