728 x 90 Leaderboard

Zgjedhjet e 21 qershorit, sa ndikojnë tek numri i turistëve? Ja statistikat e operatorëve

Nga Entela Canaj

Zakonisht periudhat zgjedhore ndikojnë negativisht në turizëm, aq më tepër kur fushatat elektorale koincidojnë  me nisjen e sezonit turistik, siç po ndodh edhe sivjet në Shqipëri. Megjithëse situata deri tani ka vijuar e  qetë dhe nuk është karakterizuar nga konflikte sërish nuk mund të flasim me siguri deri në ditën e fundit. Kjo pasi është provuar në zgjedhje të kaluara që numri i turistëve ka rënë ndjeshëm krahasuar me vitet pararadhëse, dhe ajo çka Unioni i Operatorëve Turistikë i sugjeron Qeverisë është që datat e zgjedhjeve të mos lihen përherë në periudhën e sezonit turistik.  Turistët e huaj tremben kur dëgjojnë për konflikte apo për rrëmujë të shkaktuara nga zgjedhjet, situata që përmes medias mbërrijnë deri në vendet e tyre. Kjo pastaj do të ndikojë edhe në rritjen e përgjithme të numrit të turistëve, që për sivjet parashikohet jo më shumë se 2 %.

Sadik Malaj
Sadik Malaj

“Në totalin e prurjeve turistike nga shqiptarët etnikë, nga vendet e rajonit, nga vendet e BE-së apo dhe nga vende të tjera të botës, në përgjithësi në presim një rritje, por jo shumë të lartë,  2 % më shumë se viti i kaluar, ku sërish janë shqiptarët etnike që dominojnë me 75 % të prurjeve totale, edhe pse duhet theksuar se gjeografia e turistëve në Shqipëri ka ndyrshuar shumë vitet e fundit. Sot kemi turistë nga të gjithë vendet e botës, përfshië këtu edhe aziatikë, Japonia, Korea e Jugut, Kina etj vende, që më parë nuk vinin në Shqipëri.  Po ashtu janë shtuar shumë turistët nga vendet ish komuniste si nga Çekia, Polonia, Sllovakia, etj. Tipologjia e turistëve, dhe rritja e numrit të tyre ka ardhur si rezultat i promovimit të madh që i është bërë së fundmi plazheve shqiptare nga media të ndryshme botërore, por edhe nga mediat tona, si dhe nga panairet që janë zhvilluar kudo nëpër botë dhe ku ne kemi qenë pjesëmarrës,” tha Sadik Malaj, kreu i Operatorëve Turistikë të Shqipërisë, ndërsa shton se ne duhet të përpiqemi që të ruajmë një rritje të numrit të turistëe, sidomos atyre nga vendet e BE-së, me 10 deri në 15 %, për tu bërë kështu që vend i faktorizuar për kalimin e pushimeve verore.

Pasojat e para të zgjedhjeve vendore në turizëm duket se kanë nisur të ndihen me pakësimin e grupeve shkollore, ekskursionistëve që vijnë në këtë periudhë në Shqipëri, pak para se të mbarojë viti shkollor, kryesisht në muajt maj-qershor. “Për prurjet turistike nga vendet e BE-së, nuk është se ka ndikim, pasi nuk është se ka një problematikë apo konfliktualitet të rritur mes forcave politike apo çështje të ndryshme që ndikojnë. Deri tani nuk kemi pasur probleme edhe nga mediat është përcjellë në mënyrë dinjitoze fushata dhe nuk ka pasur probleme të këtij karakteri që mund të përcillen edhe nga mediat e huaja. i vetmi problem që është hasur tani për tani janë prurjet ekskursioniste në periudhën maj-qershor, që vijnë kryesisht nga Kosova dhe Maqedonia. Sivjet në krahasim me vitet e kaluara ka pasur shumë pak ture të tilla nga shkollat e mesme apo të larta që vijnë vizitojnë për qejf apo për arsye mësimore vendet historike në Shqipëri, apo dhe plazhet tona. Mendoj se këtu ka ndikuar elementi zgjedhor,” tha Malaj, i cili shpreson që procesi zgjedhor të vijojë të jetë i qetë deri në fund, pasi kështu do të ndikojë më pak në turizëm.

Sa i përket angazhimit të pushtetit vendor me zgjedhjet dhe si pasojë e kësaj, mungesës së kohës dhe vëmendjes për t’iu dedikuar zhvillimit dhe organizimit sezonit të ri turistik, Malaj mendon se kjo nuk sjell probleme, pasi menaxhimi i turizmit është i mirëorganizuar pavarësisht kohës dhe dedikimit që mund të marrin zgjedhjet nga ana e pushtetit vendor. “Vëmendjsa e komunave apo problematikat që orientohen drejt fushatës elektorale  përveçse çështjeve të pastrimit apo elementëve të ndryshsëm, mendoj se ajo është një çështje që nuk ka të bëjë me komunat apo vendimarrjet e tyre. Sot industria hoteliere dhe agjencitë turistike janë komunitete që veprojnë vetë mbi bazën e kontratave  dhe ndonjëherë ekonomia private është si një lokomotivë që prej shumë proceseve dhe nuk ka të bëjë me çështje të problemeve elektorale,” tha Sadik Malaj.

Ndërkohë qeveria me ligjin e ri që po harton për turizmin premton më shumë mbështetje për tur-operatorët, si uljen e TVSH-së, një nga kërkesat e kahershme të tyre, që pritet të ndikojë në përmirësimin e shërbimeve dhe zhvillimin e turizmit në tërësi. Ndërkohë që Qeveria ka premtuar edhe një një tjetër hap të rëndësishëm që është heqja e  regjimit të vizave për rreth 12 vende, si Kina, vendet e Lindjes së Mesme, Rusia etj., prej të cilave vendi ka fluks të madh turistësh. Nga ana tjetër edhe ngritja e tre aeroporteve të reja do të jetë një hap më shumë drejt zhvillimit të turizmit shqiptar, si një sektor kyç dhe promotorr i zhvillimit ekonomik të vendit./tesheshi.com/

Related posts