728 x 90 Leaderboard

Tryezat koti të partive kosovare që po sjellin acarime: si u përplasën Kurti dhe Haradinaj

Nga Blendi Gashi

Tryeza e thirrur nga Vetëvendosje për caktimin e datës së zgjedhjeve, nuk ka sjellë kurrfarë rezultati pasi pozita e sheh të paarsyeshme kërkesën e opozitarëve për zgjedhje të reja.

Për më tepër, kjo tryezë në vend të një kompromisi ka sjellur acarim mes partive, konkretisht kryevetëvendosësit Albin Kurti dhe kryeministrit Ramush Haradinaj.

E gjitha nisi pasi Kurti në tryezë e tha se Haradinaj duhet të japë dorëheqje pasi në krye të qeverisë ai ka bërë vetëm veprime të dëmshme, ndërsa e quajti një kryeministër të pakicës dhe se duhet të dorëhiqet ose të masë veten në Kuvend.

“Kryeministri Haradinaj duhet të japë dorëheqje dhe vendi të shkojë në zgjedhje të lira dhe demokratike. Këto të zeza që na i bëri Haradinaj, nuk ua ka premtuar qytetarëve para një viti. Le të shkojmë në zgjedhje dhe atëherë qytetarëve të Rugovës, le t’ua hedhë hartën për fytyre siç ia hodhi Murat Mehës. Kush mund të ketë besim më në kryeministrin Haradinaj?! Dikur e mbante bajrakun për demarkacionin, kurse si u bë kryeministër, e ndërrooi qëndrimin. Ky kryeministër për karrige e bën edhe Zajednicën”, deklaroi Kurti.

Kryevetëvendosësi më tej tha se Haradinaj është kryeministër që presidenti Thaçi e ka marrë me qera, madje pohoi se për të është ushtrues detyre i kryeministrit.

Reagon Ramushi…

Nuk ka vonuar edhe reagimi i Haradinajt ndaj akuzave të Kurtit, për çka i është kundërpërgjigjur përmes një konference për media.

Haradinaj tha se Kurti është i papunë dhe si i tillë po nxit tema, ndërsa shtoi se po e kupton liderin e VV-së, ngase edhe vet ka kaluar nëpër këtë fazë, por që tash nuk ka kohë të merret me kësi çështjesh ngase ka shumë detyra.

“Tani ai është pak si i papunë dhe duhet me ngjallë tema. Kam kaluar nëpër ato që ka kaluar ai, prandaj e kuptoj. Unë jam i angazhuar të kryej detyrat e mija për të mirë të vendit”, tha Haradinaj.

“Rrëzoni qeverinë nëse i keni numrat”

Ndërkaq në tryezë partitë në pushtet, PDK e AAK i thane opozitarëve nëse i kanë numrat të marrin veprime dhe ta rrëzojnë qeverinë.

Shefi i grupit parlamentar të PDK-së, Memli Krasniqi, tha edhe pse partia e tij është kundër mbajtjes së zgjedhjeve, ata janë të gatshëm kurdo që mbahen ato.

“Urdhëroni niseni mocionin nëse doni zgjedhje, zgjedhjet nuk organizohen me tryeza, retorika dhe demagogji të kësaj natyre, dhe askush nuk po bën ndonjë hap për të bërë zgjedhjet”, tha Krasniqi.

Blerim Kuçi nga AAK deklaroi se tema e zgjedhjeve nuk është në interes të përbashkët nacional, ndërsa i rekomandoi opozitës që nëse i ka votat ta rrëzojë qeverinë në Kuvend.

“Sa i përket zgjedhjeve, edhe në takimin e parë kemi folur se nuk ka kuptim të kërkohen zgjedhje të parakohshme, nuk është temë me konsensus nacional. Z.Kurti e tha se ka një tendencë që tryezat e tilla të zëvendësojnë Kuvendin. Pikërisht kjo tryezë, kjo temë e zëvendëson Kuvendin. Kur opozita i ka votat, atëherë kjo çështje duhet të shkojë në Kuvend të kërkohet mocioni i mosbesimit të qeverisë dhe i keni 61 vota të bjerë kjo qeveri”, tha Kuçi.

Kujtojmë se në këtë tryezë, Vetëvendosje i ftoi të gjitha subjektet politike, përveç Listës Serbe.

Më poshtë mund ta lexoni deklaratën e nxjerrë nga tryeza e VV-së. /tesheshi.com/

Related posts