728 x 90 Leaderboard

“Stop”-i i Serbisë për Pacollin: a ka guxim Kosova t’a bëjë këtë me politikanët serbë?

Nga Blendi Gashi

Serbia dhe Kosova, në kuadër të dialogut politik për normalizimin e marrëdhënieve, kanë nënshkruar marrëveshje për lëvizjen e lirë të qytetarëve dhe vizitat e zyrtarëve në vitin 2014. Por kjo marrëveshje në shumicën e rasteve zbatohet veç nga Kosova e cila në vazhdimësi lejon hyrjen e politikanëve serbë, por jo edhe nga Serbia. Këtë e dëshmon së fundmi edhe refuzimi që i bën autoritetet serbe zv.kryeministrit, njëherit ministrit të Punëve të Jashtme Behgjet Pacolli, të marrë pjesë në një konferencë dy ditore të Këshillit Kombëtar Boshnjak të Serbisë në Novi Pazar.

Refuzimi bërë Pacollit nga Beogradi sadopak ja ka çelur sytë autoriteteve kosovare pasi Ministria e Punëve të Jashtme ka reaguar pas refuzimit duke paralajmëruar masa reciproke kundrejt autoriteteve serbe.

MPJ thotë se Kosova ka vepruar gjithmonë në përputhje me Marrëveshjen e Brukselit mbi vizitat e zyrtarëve të lartë dhe ka respektuar procedurat e kërkuara. Por sipas kësaj ministrie refuzimi i lejes për Pacollin tregon përsëri se Beogradi nuk është i angazhuar të respektojë Marrëveshjet e Brukselit, dhe shakton tensione të panevojshme.

“Do të ishte e arsyeshme, që Kosova të mbajë të drejtën për masa reciproke kundërdrejt autoriteteve të Beogradit sipas Marrëveshjes së Brukselit, por ne i dedikohemi të drejtave fundamentale për lëvizjen e lirë të njerëzve përderisa ato mos të jenë qëllimkeqe.Të rikujtojmë faktin se edhe vizitat e kosovarëve tek bashkëkombasit e tyre në Preshevë, Bujanoc dhe Medvegjë duhet të vëhen në reciprocitet me vizitat e serbëve tek bashkëkombasit e tyre në Kosovë. Ne, sot jetojmë në shekullin, ku lëvizja e lirë e njerëzve është e drejtë fundamentale e njeriut dhe çdo shtet e Qeveri duhej ta respektoj atë. Kosova ka respektuar këto të drejta me përkushtim të madh dhe do t’i respektoj gjithmonë derisa mos të abuzohet me to, si në shumë raste që ka ndodhur në të kaluarën me mysafirët nga shteti fqinj verior”, thuhet në reagimin e MPJ-së.

Ja ç’thonë analistët…

Përkundër kërcënimit nga MPJ me marrjen e masave reciproke, analistët politikë shprehen skeptik se mund të ndodh një gjë e tillë.

Analisti politik Albinot Maloku, thotë se refuzimi serb nuk prezanton risi për qasjen e Serbisë ndaj zyrtarëve shtetëror të Kosovës.

Ai kritikon Prishtinën zyrtare pasi thotë se nuk ka pasur e nuk duket që ka një kufi në lojërat e Serbisë me lejet për zyrtarët shtetëror të cilët ftohen dhe nuk pranohen të udhëtojnë në Serbi.

Nuk është ky rasti i vetëm i një vizite që u ndalohet zyrtarëve më të lartë të vendit. Kujtojmë ndalimin e vizitës së deputetëve Deda e Osmani edhe pse ishin ftuar të shkonin në Beograd. Rekomandimi është që Prishtina zyrtare të mos bije pre e asnjë presioni të BE-së në raport me një vendim për mos lejimin e ministrave e zyrtarëve të Serbisë në çfarëdo situate çoftë që të futen në Kosovë. Reciprocitetin si masë, Kosova nuk është duke e respektuar as aplikuar si duhet andaj, jo reciprocitet si reaksion kundër aksionit por prerje me vendim”, thotë Maloku për tesheshi.com.

Faik Krasniqi nuk e sheh befasi stopin e bërë ndaj Pacollit nga Serbia pasi thotë se prej çlirimit asnjë zyrtari të lartë kosovarë nuk i është lejuar të futet në territorin serb në cilësinë e përfaqësuesit të Kosovës.

Problemin e njëjtë e kanë pasur edhe sportistët tanë. Kurse zyrtarët serbë janë futur në Kosovë kur kanë dashur, futen edhe sot, madje edhe pa leje të institucioneve tona. Institucionet tona kurrë nuk e kanë zbatuar masën e reprocitetit, edhe pse gjithmonë janë zotuar se do ta bëjnë një gjë të tillë. Prandaj nuk pres që as në të ardhmen ta bëjnë një gjë të tillë, edhe pse prapë do të zotohen që s’do t’i lejojnë politikanët serbë të futen në Kosovë!”, thotë Krasniqi për tesheshi.com.

 

Related posts