Auto Dak
Auto Dak

Speciale/ Ja pse maqedonasit ua kanë dorëzuar shqiptarëve Kodrën e Diellit në Tetovë (ose ndryshe, Popova Shapkën e tyre)…

Tek Kodra e Diellit mbi Tetovë,  edhe pse maqedonasit kanë investuar me një kishë të ndërtuar e me një emërtesë klerikale (Popova Shapka – Kapela e Priftit), si për ta mbajtur të pushtuar, pa ta shohësh në një tjetër prizëm, ata pothuajse ua kanë dorëzuar atë shqiptarëve. Mjaft të vëresh më kujdes braktisjen e kësaj pike dimërore me nam, përqëndrimin total tek simotra e saj Mavrova, duke investuar dhe promovuar fuqishëm atë, për të kuptuar se tashmë, Kodra e Diellit vlen për shtetin maqedon vetëm për t`i bërë një karshillëk me baza nacionaliste nëpërmjet Mavrovës.

Kodra e Diellit, është larg nga Tetova vetëm 18 km dhe 45 nga Shkupi. Gjendet  në lartësi mbidetare 1875 metra, me pista për skijim më shumë se 20 km të gjata, të cilat pikënisjen e kanë në 2500 metra lartësi mbidetare.

Dhë përkundër këtyre avantazheve, të cilat Kodrës së Diellit i’a japin vlerën e një  perle natyrore, ajo sot nuk paraqet ofertë reale turistike. Mjaft të thuhet se pajisjet e atyshme janë të vjetëruara të amortizuara, ndërsa kavoja e teleferikut për transport njerëzor nga Tetova deri sipër, e cila u këput nga një predhë gjatë konfliktit të vitit 2001, as që është menduar të rivihet.

Kërkesat për investime në Kodrën e Diellit, përfshirë dhe rivënien në punë të teleferikut qëndror, asnjë herë  nuk ka munguar. Madje  shtë  shtruar edhe në  parlament nga ish deputeti Izet Zeqiri, i cili në disa raste pati propozuar dhe  amendamente me anë të të cilave kërkonte ndarje të  mjeteve buxhetore apostafat për  teleferikët e Kodrës së Diellit, por ai gjithnjë është mbivotuar nga shumica parlamentare.

Ndërsa premtimet asnjëherë nuk kanë munguar. Qeveria paralajmëroi më herët se viti 2015 do të mbyllet  me investime të cilat do të kapin shifrat  80 milionë euro, por asgjë nuk ka lëvizur. Premtuan vendosjen e dy teleferikëve, ndërtim të garazhit me kate, si dhe rindërtim të hoteleve të stërvjetëruara  për të akomoduar 15 mijë turistë brenda ditës, por deri më sot asgjë. Sot, ky destinacion turistik funksionon me 1/3 e kapaciteteve të përgjithshme që disponon, dhe ato falë vizitorëve kryesisht nga Kosova dhe Shqipëria, të cilët ngadalë por sigurt, po i humb. Sepse dhe këta të fundit po zhvendosen për në Mavrovë, atje ku shteti ka stimuluar investimet.

Shumë analistë dhe njohës të fushës së turizmit por edhe rrethanave politike, këto zhvillime i cilësojnë si të qëllimshme për të dëmtuar imazhin e kësaj qendre turistike, madje shpesh në parkingun e hoteleve, forcat policore dhe ushtria realizojnë stërvitjet e tyre duke krijuar një imazh jo të pëlqyeshme për vizitorët.
Pronarët e hoteleve private janë ankuar se kjo bëhet me qëllim për të prishur sezonin turistik në Kodrën e Diellit, sepse siç thonë ata, shteti promovon Mavrovën si destinacion kryesor turistik, ndërsa injorimi që i bëhet kësaj qendre turistike është i papranueshëm nga fakti se Qeveria e Maqedonisë, me programin e saj për zhvillim 2014-2018,  promovon qendra të cilat në bazë të kapaciteteve, as për së afërmi nuk mund t`i afrohen Kodrës së Diellit. Paralajmërohen shtigje skijimi në Pllaçkovicë, Gollak e gjithandej Maqedonisë lindore,  të cilat janë vende pa kushte për investim real.

Por, nuk është vetëm pushteti qendror fajtor për situatën e krijuar, pasi qytetarët ankohen edhe për paaftësinë e organeve komunale të Tetovës që t`i kryejnë detyrimet që kanë, karshi kompetencave. Rrugët shpeshherë mbeten të pakalueshme nga bora e papastruar, ndërsa është shtuar edhe numri i qenëve endacak, si rezultat i mosgrumbullimit të mbeturinave, thonë ata.

Një fije shprese, ngjall pohimi i ministrit të ekonomisë Bekim Neziri, i cili kohë më parë nga Tirana tha se Kodra e Diellit do të  shpallet “Zonë e Lirë Turistike”, që nënkupton se investitorët do të jenë të liruar nga tatimi i vlerës së shtuar dhe tatimi personal, ndërsa vendin do t’mund ta blejnë për 1 euro metër katror , aq sa do t’paguajnë dhe për shërbimet komunale.

Deri atëherë, kjo qendër turistike do t’vazhdojë të funksionojë e margjinalizuar me pagëzim të dyfisht, për shqiptarët “Kodra e Diellit”, ndërsa për maqedonasit “Popova Shapka”, (Kapela e Priftit). /tesheshi.com/

auto pjese dak

Related posts