Auto Dak
Auto Dak

Një ditë në Shëngjin: Ç`thonë të huajt, kosovarët e shqiptarët e diasporës për plazhin e atyshëm

Nga Entela Canaj

Turistët nga Kosova janë ata që dominojnë më së shumti në plazhin e Shëngjinit, por ketë verë duket se edhe turistët e huaj, sidomos nga Sllovakia kanë nisur ta frekuentojnë plazhin e bukur verior. Familjarisht apo me shoqërinë turistët sllovakë po pushojnë në Shëngjin, dhe thonë se Shqipëria iu pëlqen pa masë dhe se plazhi është i pastër.

Familje nga Sllovakia

Martin nga Sllovakia

Martini ka më shumë se një javë që ka ardhur në Shëngjin me dy prindërit e tij. Në gjuhën angleze na thotë se plazhi i Shëngjinit ka rërë të butë, dhe ujë të ngrohtë, dhe se i pëqlen këtu. Sa për kushtet dhe çmimet janë pothuaj të njëjta si në Sllovaki. “Jam nga Sllovakia. Është hera e parë që vij në Shqipëri. Është bukur më pëlqen, plazhi me rërë është i këndshëm, uji i detit është i ngrohtë, i pastër. Mendoj se është këndshëm për të qëndruar. Këtu ka dhe shumë hotele për `tu akomoduar. Unë jam këtu me familjen time dhe kemi 11 ditë që qëndrojmë në një hotel që është buzë detit. Nuk ka mundur të shoh plazhe të tjera të Shqipërisë, por do më pëlqente. Mendoj se shërbimet dhe çmimet janë të njëjta me Sllovakinë,” tha Martin nga Sllovakia.

Turiste nga Sllovakia

Edhe një tjetër turiste nga Sllovakia këtë verë ka zgjedhur Shqipërinë dhe Shëngjinin për t`i kaluar pushimet. Ajo është fejuar me një djalë shqiptar dhe ka dashur të njoh vendin e tij. Është hera e parë që vjen, Shëngjini po i pëlqen, ndërsa sa për pjesën tjetër të Shqipërisë, thotë se do të vijë sërish vitin tjetër për ta shëtitur më gjatë vendin e të dashurit të saj. “Jam nga Sllovakia. Kam ardhur këtu me të fejuarin tim. Më pëlqen ky plazh, është hera e parë që vij në vendin tuaj, dhe për aq sa kam parë them se Shqipëria është një vend i bukur dhe miqësor. Nuk e di, mbase do të vij sërish vitin tjetër dhe ta shoh më mirë Shqipërinë,” thotë turistja nga Sllovakia.

Turistë nga Kosova

Shumica e turistëve të tjerë në plazhin e Shëngjinin janë shqiptarë nga trojet, nga Kosova, Presheva dhe gjithë Diaspora. Pothuajse çdo verë zgjedhin plazhin e Shëngjinit pasi është bukur dhe pastër, edhe pse nuk e mohojnë se këtë vit çmimet janë rritur paksa, si te ushqimet ashtu edhe për dhomat në hotele. Sipas informacioneve që ne mundëm të merrnim një dhomë hoteli në plazhin e Shëngjinit që vjet ka qenë 25-30 euro këtë vit nuk e gjen më pak se 50 euro nata. Po ta llogaritësh edhe ushqimin që të duhet të hash jashtë, për një familje me 4 anëtarë, 10 dite pushime në Shëngjin i shkojnë mesatarisht 1500 euro. “Jemi nga Kosova, është viti i dytë që vijmë në Shëngjin. Kushtet, shërbimi, pastërtia në plazhe janë të mira, edhe çmimet deri diku mirë. Ne kemi marrë dy dhoma nga 30 euro nata për secilën. Kemi zgjedhur Shëngjinin se tek e fundit është vendi jonë, vendi i shqiptarëve, edhe më herët kemi qenë në Ulqin, në Durrës.  Them se Shëngjini është më mirë në të gjitha aspektet, pastërtia e plazhit, ushqimi, shërbimet për këto arsye e kemi zgjedhur Shëngjinin,” thotë Behar Haxhaj nga Kosova.

Turistë nga Diaspora

Ka edhe nga ato familje shqiptare që kanë emigruar për vite të tëra jashtë vendit dhe kthehen në Shqipëri për nostalgji. Kështu ka bërë edhe zonja Shemsije Tanaj e cila ka afro 30 vite që jeton në Gjermani me familjen e saj, dhe kanë ardhur në Shëngjin për plazh, pasi me kursimet e tyre kanë mundur të blejnë edhe një shtëpi plazhi. “Jemi krejt si familje në Gjermani, u bënë afro 30 vite andej. Kthehemi shpesh në Shqipëri, dhe rrimë gjatë, edhe 3 muaj edhe më pak, varet si ti kemi punët dhe pushimet andej. Jemi nga Kosova por jetojmë në Gjermani tani. Kam ardhur si fillim me burrin ndërsa këto ditë na vjen dhe djali, vjet kemi qenë në Durrës, sivjet zgjodhëm Shëngjinin. Unë qëndroj te shtëpia e vajzës, ajo ka një banesë këtu dhe kur vijmë në plazh akomodohemi aty. Edhe për të gatuar jashtë hamë. Jam e kënaqur me shërbimet këtu, jemi shumë të kënaqur në përgjithësi,” tha Shemsije Tanaj.

Plazhi i Shëngjinit  i ka pritur këtë vit turistët edhe me një infrastrukturë më të mirë, ku rrugët me gropa janë mbyllur, dhe afër plazhit është bërë një shëtitore. Megjithatë plazhistët dhe pronarët e lokaleve ankohen për mosmbledhjen e mbeturinave, për të cilat punonjësit e Bashkisë nuk janë shumë korrekt, kjo edhe për shkak të zgjedhjeve që përkuan këtë vit me sezonin veror. /tesheshi.com/

 

auto pjese dak

Related posts