728 x 90 Leaderboard

Ndalimi i emigrantëve: si Trump i sugjeroi Spanjës të ndërtonte mur përmes Saharasë

Donald Trump apeloi Spanjën “të ndërtonte mur” – përmes Saharasë. Ministri i Jashtëm spanjoll thotë se presidenti amerikan këshilloi taktikën për të ndalur emigrantët që kalojnë përmes Mesdheut.

Donald Trump i ka sugjeruar qeverisë spanjolle ta menaxhojë krizën e emigrantëve në Mesdhe, duke u frymëzuar nga një prej politikave të tij më të famshme, me ndërtimin e një muri përgjatë shkretëtirës së Saharasë. Sugjerimin e ka bërë të ditur ministri i Jashtëm i këtij vendi.

Sipas Josep Borrell, presidenti amerikan hodhi poshtë skepticizmin e diplomatëve spanjollë – të cilët i vunë në dukje se Saharaja shtrihet për 3 mijë milje, duke thënë: “Kufiri i Saharasë nuk mund të jetë më i madh sesa kufiri ynë me Meksikën”.

Trump iu premtoi votuesve në zgjedhjet e vitit 2016 se do të ndërtonte një “mur të madh e të bukur” përgjatë kufirit SHBA-Meksikë , që është pothuajse 2 mijë milje i gjatë.

Një plan i ngjashëm në Sahara, sidoqoftë, do të komplikohej nga fakti që Spanja mban vetëm dy enklava të vogla në Afrikën e Veriut – Ceuta dhe Melilla – dhe një mur i tillë do të ndërtohej në territor të huaj.

Komentet e Borrell u bënë në një drekë në Madrid këtë javë dhe u raportuan gjerësisht në median spanjolle. “Ne mund të konfirmojmë atë që ka thënë ministri, por ne nuk mund të bëjmë komente të mëtejshme për deklaratat e tij”, tha një zëdhënës i ministrisë së Jashtme.

Trump mendohet se i ka bërë rekomandimet për kufirin kur Borell shoqëroi mbretin Felipe dhe mbretëreshën Leticia në Shtëpinë e Bardhë në qershor.

Spanja ndodhet në vijën e frontit në lidhje me krizën e emigrantëve me më shumë se 33 mijë emigrantë dhe refugjatë që mbërritën nga deti deri tani këtë vit, ndërsa 1,723 persona humbën jetën në këtë përpjekje të dëshpëruar. Shtimi i mbërritjeve të reja, që llogaritet sa trefishi i totalit të së njëjtës periudhë të një viti më parë, do të thotë se Spanja po tejkalon Italinë dhe Greqinë si destinacion kryesor për emigrantët që kapërcejnë Mesdheun.

Kryeministri socialist i Spanjës, Pedro Sánchez, u vlerësua gjerësisht për njoftimin se Madridi do të pranonte 630 refugjatët në bordin e anijes së shpëtimit Aquarius. Refugjatët ishin kthyer pas nga Italia dhe nga Malta.

Por, numri i lartë i mbërritje të reja në bregun jugor të Spanjës ka vendosur në vështirësi vendet e pritjes dhe infrastrukturën në këtë vend. Çështja po ashtu, është përdorur si armë politike nga partitë e krahut të djathtë që e akuzojnë qeverinë e Sánchez për standarde të dyfishta dhe se është mjaft e butë për emigracionin.

Borrell, ish-president i Parlamentit Europian, më parë e ka akuzuar Europën për “politikë struci” për emigracionin dhe ka apeluar për t’i dhënë perspektivë kësaj çështjeje. “Ne po flasim për rreth 20 mijë emigrantë deri tani këtë vit për një vend me më shumë se 40 milionë banorë”, tha ai në korrik. “Ky nuk është emigracion masiv”.

Ai po ashtu tha se problemet e Spanjës janë të vogla në krahasim me vendet e Lindjes së Mesme që presin refugjatët e luftës në Siri, duke shtuar: “Ne po e sprovojmë fjalën ‘masive’”.

Duke folur në një aktivitet në Madrid këtë javë, Borrel tha se maksima politike e viteve 1990 “është ekonomia, budalla”, ia ka lënë vendin: “ka të bëjë me identitetin, budalla”.

“Ne kemi zgjidhur problemin ekonomik, por jo problemin e emigracionit për shkak se është një problem emocional dhe i tillë që nuk mund ta rregullosh me para”, tha ai, sipas raportimeve në “El País” dhe “Europa Press”. “Shoqëritë europiane nuk janë të strukturuara të thithin më shumë se një farë përqindjeje emigrantësh, sidomos nëse ata janë muslimanë”.

Përgatiti: Juli Prifti -/tesheshi.com/

Related posts