Kokaina, tjetër shqiptar i vrarë në Amerikën Latine: kush është borshioti i ekzekutuar në Kolumbi

Pas vrasjeve të 3 shqiptarëve në Ekuador, një tjetër është ekzekutuar kësaj radhe në kryeqytetin e Kolumbisë, Bogota.

Bëhet fjalë për borshiotin Adriatik Lagji, i cili jetonte prej vitesh në kryeqytetin kolumbian.

Vrasja ka ndodhur në fillimet e këtij muaji, por që dokumentet kanë mbërritur vetëm në fund të javës.

Lagji, i cili thirrej Ardian dhe ishte me origjinë nga Borshi i Sarandës, jetonte prej kohësh në Kolumbi, madje ishte i martuar atje dhe kishte një djalë.

Rrethanat e atentatit mbeten ender mister, por DEA amerikane ka marrë që në ditën e parë të dhënat mbi këtë vrasje.

Dy janë dilemat e vrasjes së borshiotit: o është vrarë në një atentat, si pasojë e përfshirjes në pazaret e kokainës, ose ka qenë peng i gjysmë tonit kokainë që u kap dy muaj më parë dhe tashmë u hoq qafe nga bosët.

Gjithashtu, ekziston frika mos po ndodh një larje hesapesh brenda grupit shqiptar që është vendosur në Amerikën Latine, si pjesë e paranojës se tashmë ata bashkëpunojnë me amerikanët e DEA-s.

Vrasja e Ilir Hidrit në Ekuador dhe e Fadil Kaçaniç, një ish-diplomat i vjetër i Jugosllavisë, tashmë janë dokumentuar dhe ka të dhëna të forta se janë vrarë nga dyshimet se kanë bashkëpunuar me DEA-n.

Grupi kriminal që bën biznes me shqiptarët prej vitesh është një nga më të tmerrshmit dhe më të përgatiturit në Kolumbi. Ai funksionon si organizatë paraushtarake dhe nuk bën bujë në publik.

Për mbi 10 vjet, marrëveshjet me shqiptarë gjithçka ka shkuar “grurë” dhe qindra tonelata kokainë kanë lundruar drejt Britanisë së Madhe, Holandës, Gjermanisë, Greqisë etj., duke siguruar fitime marramendëse nga të dy palët.

Por vetëm në dy ditët e fundit, kur amerikanët kanë hyrë fort në reformën në drejtësi, por edhe DEA është futur vetë për të hetuar lidhjet dhe biznesin e narkosve shqiptarë, gjërat duket se kanë marrë rrokopujën në “deal-in” e artë mes kolumbianëve dhe shqiptarëve.

Dhe ekziston shumë frika se një menaxhim jo i duhur i situatës aktuale mund të sjellë trazira të mëdha.

Bëhet fjalë për grupe njerëzisht që kanë në duar shuma marramendëse parash që shkojnë në miliona dollarë të fituara nga trafiku i drogës.

Këta para cash, nëse hidhen në qarkullim mund të ketë destabilizim të frikshëm të situatës në vend.

Ka të dhëna se në dy vitet e fundit këta para janë përdorur edhe në media e politikë.

Vrasja e Adriatik Lagjit në Kolumbi ka ndodhur pas deklaratës së ambasadorit amerikan Donald Lu, se hetimet për kokainët e Maminasit po shkojnë drejt fundit dhe tani do të kryhen arrestimet e para.

Megjithatë ka shumë dyshime mbi çështjen e viktimës me origjinë nga Bregu, që ende po hetohen në këto momente nga policia kolumbiane dhe DEA.

Bogota ku jetonte shqiptari nga Borshi nuk është vend ku zakonisht jetojnë narkotrafikantët.

Kryeqytetit kolumbian është vendi ku ndodhen bankat dhe institucionet shtetërore, ku ka një përqëndrim maksimal të policisë dhe shërbimeve sekrete.

Vrasjet e atentatet janë kryer gjithnjë nga njerëz të ardhur nga zonat e nxehta të narkotrafikut si Medelin, Kali, apo zona e Gjirit.

Në Bogota ndodhen edhe selitë diplomatike dhe qendra e fuqishme e DEA-s amerikane.

Ç’donte Lagji në Bogota? Ai ishte martuar me një vajzë kryeqytetase, kishin një djalë dhe vetë borshioti mësohet se gëzonte reputacion të mirë në zonën ku banonte.

Ngjarjet e vetëm dy viteve të fundit kanë krijuar një gjeografi të plotë që tregon se dyndja e shqiptarëve në Amerikën Latine, përkatësisht trekëndëshin Kolumbi, Ekuador Venezuelë përbën një koloni që nuk lindi brenda ditës.

Për këtë ka një dosje të gjatë e gjerë, e cila është ndjekur figurë pas figure nga amerikanët për të gjetur lidhjet në Shqipëri.

Dhe pikërisht ajo që ka ndodhur edhe me Escobarin e kolegët e tij po bëhet realitet edhe me shqiptarët.

Kur përhapen hetimet dhe bosët po shkojnë drejt burkit, fillon fushata e ekzekutimit të ushtarëve.

Por për të ardhur deri tek dita finale, të dyja palët janë në luftë për të mos i treguar njëri-tjetrit armët…/tesheshi.com/

 

Related posts