728 x 90 Leaderboard

Intervista: Kosova pa det, si po kërkon sukses ndërkombëtar në not

Katër garues nga Kosova morën pjesë në këtë fillim gusht në kampionatin Evropian të notit në Glasgow të Skocisë. Ata përmirësuan kohërat e tyre, kanë thyer rekorde të vendit, por nuk kanë shmangur pozitat e fundit duke qenë larg rezultateve që sigurojnë normën olimpike.

Por duke qenë se janë tejet të rinj, në moshë 14-16 vjeç, pritjet janë se në të ardhmen do mbrojnë denjësisht shtetin.

Veton Telaku, nënkryetar i Federatës së Notit të Kosovës në një intervistë për tesheshi.com tregon për paraqitjen e garuesve në Skoci, për pritjet në garat e ardhshme si dhe me ç’probleme ballafaqohen klubet e notit…

Intervistoi: Blendi Gashi

Kosova mori pjesë në kampionatin Europian në Not në Glasgow të Skocisë. A mund të na tregoni me sa garues u paraqitët dhe në ç’farë disiplina?

Përfaqësuesja e Kosovës në kampionatin Europian në Not në Glasgow të Skocisë ka marrë pjesë me katër garues. Ata janë: Fjorda Shabani, Eda Zeqiri, Dion Kadriu dhe Dren Ukimeraj. Nga data 3 gusht notuesit nga Kosova u paraqiten në disiplina të ndryshme ku arritën përmirësime të kohës personale.

Sa jeni ndarë të kënaqur me prezantimin e garuesve?  Cili është suksesi që shënuan?

Jemi të kënaqur me paraqitjen e garuesve edhe pse nuk fituan ndonjë medalje. Si sukses mund të quajmë thyerjen e pesë rekordeve shtetërore dhe arritjen e 686 pikëve finë.

Keni thyer rekorde shtetërore por nuk keni arritur ndonjë medalje. Çfarë u mungon notuesve kosovarë të arrijnë në nivele më të larta?

Po notuesit kane thyer 5 rekorde shtetërore. Fjorda Shabani dy rekorde, Dren Kadriu dy rekorde dhe Eda Zeqiri një rekord.

Sa i përket medaljeve thënë drejtën duhet punë ende, por nuk do të thotë që nuk mund të arrihen edhe ato. Shpresoj dhe besoj që në të ardhmen nuk do të na mungojnë edhe medaljet sepse notuesit tanë janë të rinj në moshë dhe premtojnë shumë. Vajzat janë të moshës 14 vjeç dhe djemtë të moshës 16 vjeç.

Notuesve tanë u mungon përvoja por duhet edhe punë dhe përkushtim edhe më i madh. Një lajm i mirë është se ditë më parë është vënë gurëthemeli i pishinës Olimpike në qytetin e Prizrenit dhe shpresoj që kjo të ndikojë drejtpërdrejt në rezultatet e garuesve.

Garuesit që ishit në Skoci sigurisht janë më të dalluarit në klubet kosovare. Cila do jetë gara e radhës ndërkombëtare dhe a pritni paraqitje më të mira?

Po është e vërtet se në të gjitha garat ndërkombëtare përfaqësuesja shkon me notuesit më të mirë të vendit. Gara e ardhshme do të jenë Lojërat Olimpike për të rinj që do mbahen nga data 06 deri 18 tetor të 2018-tës në Buenes Aires të Argjentinës. Sigurisht se presim paraqitje të mirë. Do punojmë për këtë gjë. Shpresoj të arrijmë rezultate sa më të mira dhe ta përfaqësojmë denjësisht shtetin.

Pasi jeni nënkryetar i Federatës së Notit të Kosovës, a mund të na tregoni cila është gjendja e klubeve në përgjithësi? Pra me ç’probleme ballafaqohen?

Në përgjithësi klubet në Kosovë ballafaqohen me probleme të shumta financiare dhe mungesë të infrastrukturës. Mungojnë pishinat e mbyllura dhe kjo ndikon drejtpërdrejt në suksesin e sportistëve.

Sa keni përkrahjen e shtetit si Federatë, por edhe klubet në përgjithësi sa ndihmohen?

Si Federatë ndihma nga ana e shtetit nuk është se mungon, mirëpo problemi qëndron në vonesa të pagesave nga ana e Ministrisë së Sportit dhe këto vonesa po dëmtojnë  mbarëvajtjen e garave brenda kalendarit të Federatës. Kurse sa i përket klubet ato mbështeten nga Komunat, konkretisht nga Drejtoria e Kulturës Rinisë dhe Sportit.

Për fund, nëse mund të jepni informata sa është numri i notuesve në gjitha klubet kosovare dhe sa ka interesim nga të rinjtë të bëhet pjesë e këtij sporti?

Në Kosovë aktualisht janë të licencuara 16 klube sportive të notit, por ka edhe shumë shkolla noti. Në gara marrin pjesë rrethe 350 garues, mirëpo vlen të thuhet se interesimi për tu marrë me këtë sport është shumë i madh. /tesheshi.com/

 

Related posts