Ia vranë dhe ia dogjën të atin, i biri i ish-veprimtarit të LDK-së: Shpresë tek Specialja

Nga Blendi Gashi

Sot më 23 korrik bëhen plot 17 vite nga vrasja te veprimtarit të shquar të LDK-së, njëherit avokatit Shaban Manaj. Që prej atëherë e deri më sot, asgjë nuk është zbardhur rreth këtij rasti, as motivet dhe sigurisht as autorët.

I biri, Shkëmb Manaj, beson se krimi makabër që i ka marrë jetën të atit, ka prapavijë politike. Ajo ka ndodhur bash në kohën e të tjera vrasjeve të ngjashme, viti 1999, menjëherë pas lufte. Sipas tij, vrasja e babait ka patur për qëllim frikësimin e atyre që ishin ithtarë të Rugovës. Rasti bëhet më i dhimbshëm, pasi një pjesë e trupit të tij edhe u dogj nga vrasësit

Shkëmbi, në një intervistë për tesheshi.com kujton kohën kur ju kumtua lajmi i kobshëm për vdekjen e babait, tregon emrin e të akuzuarit kryesor, si dhe pritjen nga Gjykata Speciale që ta zbardh si  rast.

Shkëmb, si e kujtoni kohën kur u vra prindi juaj?

Ka qenë kohë e vështirë. Ne, çdo ditë e kemi pritur vrasjen e babait nga regjimi i Millosheviqit sepse ka qenë në krye të levizjes për liri dhe pavarësi, por kurrë nuk kemi pritur që babai mund të vritet në Kosovën e pas luftës.

Babai ishte kandidat i Lidhjes Demokratike të Kosovës në Istog për zgjedhjet e para lokale të vitit 2000. Rrëmbimi ka ndodhur vetëm njē ditë pasiqë është publikuar lista e kandidatëve në media.

Babai me 23 korrik është rrëmbyer në pabesi. Tek me datën 5 gusht KFOR-i spanjoll në Istog na e ka dhanë njoftimin se Shabani është i vrarë. Ato dy javë të zhdukjes kanë qenë shumë tē vështira sepse nuk dinim asgjë për fatin e babait sepse vrasesit pasiqë që e kishin vrarë, e kanë djegur pjesën më të madhe të trupit të tij të pajetë, për të humbur gjurmët e krimit.

Sa ka punuar drejtësia kosovare për ta zbardhë këtë rast? Deri ku kanë shkuar hetimet?

Gjatë viteve 2001-2002 është mbajtur një proces gjyqësor maratonik në të cilin kanë qenë tetë të arrestuar, të cilët në fund të procesit në mungesë të fakteve janë liruar. Njëri nga të akuzuarit, Mark Oroshi, si i dyshuar kryesor, në vitin 2006 është ekzekutuar, dhe sipas të dhënave vrasja e tij është bërë sepse ai kishte tentuar të bashkëpunonte me organet e drejtësisë duke dhënë informacionet kush e ka urdhëruar vrasjen e babait. Vrasja është e motivuar politikisht.

A pritni që Gjykata Speciale ta zbardhë vrasjen e babit tuaj ?

Gjykata Speciale ka mandat ligjor, lendor dhe kohor për ta trajtuar vrasjen e babait sepse edhe në raportin e prokurorit special, Williamson janë trajtuar edhe vrasjet e veprimtarëve politik të cilat janë trajtuar si vrasje të kundërshtarëve politik.

Ne si familje presim që kjo gjykatë ta trajtoj këtë vrasje dhe vrasjet tjera me motive politike. Në rrethanat aktuale, kjo gjykatē ka kredibilitet për të trajtuar këto vrasje në menyrë profesionale dhe të paanshme.

Organet e drejtësisë në Kosovë nuk mund t’i zgjidhin këto raste, ashtu siç nuk kanë mundur për 17 vite me radhë. /tesheshi.com/