Gratë s’kanë pse mbulohen? Si qëndron e vërteta e deklarimit të klerikut saudit

Prej dy ditësh, në media të ndryshme, botërore e shqiptare bashkë, po qarkullon lajmi i një deklarimi të bërë nga një klerik i njohur në Arabinë Saudite, mbi mbulimin e femrës. I thjeshtëzuar e krejt sipërfaqsisht, ai është servirur si kumtim fetar mbi jo-detyrimin e femrës për t’u mbuluar, referuar dhe një thënie tjetër të klerikut, po në deklarimin e tij të bërë lajm, që “90 përqind e femrave në botë nuk mbulohen”

Si shembull po marrim lajmin e dhënë nga Top Channel me këtë objekt

Titulli është: “Ndryshimet në Arabinë Saudite, kleriku: Gratë s’kanë pse mbulohen”

Më pas vijon teksti i lajmit:  “Gratë saudite nuk kanë pse të veshin abajën, një veshje e gjatë dhe e lirshme, e ngjashme me një pelerinë, që përdoret për të mbuluar trupat e tyre në publik”. Pra, nuk qenka fjala për mbulim por për një lloj veshjeje të quajtur abaja.

Megjithatë, pakkush ose askush nuk është përpjekur të bëjë diferencën mes “mbulimit” si etikë e përgjithshme e detyrueshme dhe llojit të veshjes, abaja.

Dhe kjo ka bërë që spekullimi të jetë masiv, siç e lehtëson këtë gjë dhe portalizimi i lajmit, apo i mendjes më saktë.

Justinian Topulli, kreu i Lidhjes së Hoxhallarave të Shqipërisë, ofron një sqarim të thukët të asaj çfarë ka thënë kleriku saudit.

Kjo është abaja

“Shejhu Abdullah El-Mutlak është pyetur për abajen, se si duhet të mbahet, mbi kokë apo mbi shpatulla, dhe ai përgjigjet: “Nuk është problem, mund të mbahet edhe mbi kokë, edhe mbi shpatulla, e rëndësishme është mbulimi. Ndërkohë që mbi 90% e grave muslimane të devotshme (të mbuluara) në botën islame, nuk e vendosin abajen dhe nuk e njohin atë, ne shohim shumë prej tyre që janë muslimane të devotshme, hafize të Kuranit, thirrëse të fesë islame, që vijnë në Mekë dhe Medine, por që nuk mbajnë abaje. Kështu që nuk kemi pse i detyrojmë gratë të mbajnë abaje, sepse ajo te ne është mbulesë, dhe përfshihet tek ajeti i mbulimit: “O Profet, thuaju grave dhe vajzave të tua, si dhe grave të besimtarëve, që të lëshojnë mbulesën e tyre (të kokës) përreth trupit. Kjo është mënyra më e përshtatshme që ato të njihen e të mos ngacmohen nga të tjerët. Me të vërtetë, Allahu është Falës dhe Mëshirëplotë.” (Kurani 33:59)

Që nga konteksti duket qartë se për çfarë bëhet fjalë. Bëhet fjalë për një veshje që në gjuhën arabe quhet “abaje”, e cila në shqip mund të përshtatet si pelerinë, që mbulon gjithë trupin, dhe mund të vendoset mbi kokë, ose mbi shpatulla dhe ka mëngë të gjera, dhe jo për shaminë apo mbulesën islame, që njihet me termin “hixhab”, por thjesht për një veshje të veçantë, që është e përhapur kryesisht në gadishullin arabik dhe disa vende të tjera.

Kështu që çdo gjë tjetër përveç kësaj, është thjesht spekulim mediatik, gjueti në ujë të turbullt. Nuk është hera e parë dhe nuk ka për të qenë as e fundit, që përhapen të tilla lajme të rreme, që keqinterpretohen dhe deformohen me qëllim ose jo, ndaj çdokush që merret me informimin e njerëzve, e ka për detyrë të sigurohet për saktësinë dhe vërtetësinë e lajmit, para se t’ua ofrojë atë të tjerëve”, sqaron ekskluzivisht për tesheshi.com, studiuesi Justinian Topulli. /tesheshi.com/  

 

Related posts