728 x 90 Leaderboard

Financial Times, reportazh nga Tirana për Ramën: Si ndërton shtet një artist!

Gazeta Financial Times e nis reportazhin e saj për kryeministrin Edi Rama me një përshkrim të vizitës së kancelares gjermane, Angela Merkel në Tiranë, “fanfarat” që e shoqëruan dhe surprizën ekstra që i kishte reverzuar Rama.

Gazetari Peter Aspden kujton se kryeministri mban lapustila në zyrën e tij dhe më parë ka këmbëngulur që ndërtesat në Tiranë të lyhen me ngjyra të forta. Tashmë, ndërsa Rama e Merkel shkonin për të mbajtur konferencën e shtypit, thotë gazetari Peter Aspden, një ndërtesë imponuese e ndërtuar nga regjimi komunist, kryeministri shqiptar e futi Merkelin në një dhomë të vogël, ku i paraqiti disa nga artistët me më shumë ndikim të kohës sonë.

Mes tyre edhe bashkëpatrioti i Merkel, Thomas Demand që e përshkroi më pas takimin surreal dhe të sikletshëm.

Pas tyre në sallën e konferencave, dy liderët kishin një fotografi gjigande të Demand, quajtur “Shenja” e që tregon një shtrëngim duarsh.

Jashtë ndërtesës, kishte edhe disa mesazhe të tjera artistike për mikeshën e nderuar të Ramës. Një prej tyre, skulpturat e famshme të Höller, “Tre kërpudhat gjigande”.

Në hyrje dritat vezulluese të dizenjuara nga Parreno, mirëprisnin vizitoren me një prekje të pangatërrueshme stili. Përfaqësonte jetën e re për ndërtesën që për shumë vjet ishte një seli e regjimit komunist.

“Rama, thotë gazetari, artisti i shndërruar në politikan po i tregonte Merkelit, një nga lideret më të fuqishme në botë se asgjë, në pikëvështrimin e tij, nuk mund ta ndryshojë botën si bën arti”.

Gazetari e vijon rrëfimin ditën e dytë të qëndrimit në Shqipëri, me një vizitë private në zyrën e Ramës, të cilën e përshkruan të mbuluar me letra muri me abstraksione plot ngjyra kundrejt një fushe të bardhë. “Janë doodle-t e mia”, thotë Rama, që më parë ishte një artist aktiv.

“Nuk ngjan me asnjë nga zyrat e politikanëve që kam vizituar më parë, ka kuti me lapustila kudo në dhomë, dhe muzika orkestrale ndjehet në sfond. Në qoshe, qëndron një top basketbolli në një mbajtëse kapelesh. Ai tashmë vesh kostum elegant dhe prerje flokësh moderne”, shkruan gazetari.

“Arti vjen i pari”, thotë Rama. “Në opinionin tim, arti fillimisht ndodh, dhe më pas të gjithë flasin për atë që ndodhi. Qendra në kryeministri nuk është vetëm një qendër kulturore, por një hapësirë publike, ku kultura, politika dhe arti mund të ndodhin, të gjitha së bashku”.

Në kryeministri ka edhe një koleksion me artefakte të viteve komuniste të Shqipërisë e një depo me mallra nga më të pazakonshmet, që nga sende të pastrimit deri tek mjete bujqësore.

Rama, si i ka thënë gazetarit, ka mësuar nga eksperimenti me lyerjen e fasadave se aestetika mund të ketë ndikim në cështjet sociale. “Angela Merkel më tha pasi pa qendrën, se një nga gjërat më të tmerrshme të komunizmit ishte se, përmes artit, nuk promovonte shijen”, thotë Rama, duke nxjerrë një konkluzion: “Kur promovon shijen artistike, promovon cilësi më të mira jetese, dhe një kuptim më të mirë të qytetarisë dhe përgjegjësisë”…./tesheshi/

 

Related posts