Caktohen avokatët për proçesin e pritshëm të grupit të “Sirisë” – ja si shprehet njëri prej tyre për mbrojtjen që do bëhet…

Nga  Arseola Mulia

Më 17 mars, në Gjykatën e Krimeve të Rënda do nis proçesi mbi grupim me 9 persona , të ashtëquajtur “xhihadistë” , të cilët janë angazhuar në dërgimin  e personave të ndryshëm duke i çuar në frontin e luftës në Siri. Ata i arrestuan afro një vit më parë dhe, tashmë për secilin prej tyre, prokuroria ka formuluar akuzat përkatëse, ku përbashkuesja është ajo për nxitje të akteve terroriste. Një i tillë gjygj, ndodh për herë të parë në gjykatat shqiptare, ndërkohë që e veçanta është se një pjesë e të akuzuarve, nuk kanë pranuar avokat mbrojtës. Por kjo nuk do të thotë se nuk do ketë mbrojtje për ta. Tre avokatë të caktuar për të bërë avokatinë ndaj tyre siç e kërkon ligji, janë: Sokol Mëngjesi, Klodian Skënderaj dhe Pelivan Luci.

Sipas organit të akuzës, të pandehurit në bashkëpunim me njëri tjetrin kanë rekrutuar një sërë personash duke realizuar për ta dhe pasojën përfundimtare: dërgimin e tyre në drejtim të Sirisë. Prokuroria pretendon se për ta realizuar një gjë të tillë, të pandehurit kanë shfrytëzuar bindjet fetare të personave, dhe konkretisht kanë shfrytëzuar besimin fetar musliman. Por si do realizohet mbrojtja ndaj tyre? Në një kontakt me avokat Sokol Mëngjesi, i cili do mbrojë të pandehurin Verdi Morava, kemi marrë paraprakisht prej tij  prononcim:

“Unë kam kontaktuar me klientin tim Verdi Morava dhe ai nuk ka pranuar asnjë akuzë dhe akt të paraqitur nga organi i akuzës. Klienti që unë përfaqësoj është i pafajshëm dhe nuk ka asnjë lidhje dhe asnjë përfshirje në një ngjarje të tillë me qëllime terroriste, siç pretendohet nga prokuroria.”      

A i njeh klienti juaj, pra i pandehuri Verdi Morava, të akuzuarit e tjerë të kësaj çështjeje, dhe a ka patuar ai një bashkëpunim me ta siç pretendon prokuroria?                                                                                                                                 Fakti që mund të njihesh me dikë, nuk të implikon në asnjë çështje dhe bashkëpunim. Klienti im nuk ka bashkëpunuar më asnjërin nga personat dhe nuk ka kryer asnjë veprimtari të tillë siç pretendon prokuroria. Verdi Morava që unë përfaqësoj është i papërfshirë në këtë çështje.

Keni informacione që ndonjëri nga të akuzuarit mund të këtë përmendur emrin e klientit tuaj gjatë hetimeve nga prokuroria?                                                                                                                                                                                         Edhe nëse kjo ka ndodhur, ose mund të ndodh nuk do të thotë asgjë. Sepse kushdo mund të përmendë emrin e kujtdo, por nëse nuk ka prova ata mbeten vetëm fjalë.                                                                                                            

Por në fakt Verdi Morava është një besimtar i devotshëm dhe  ka gjasa që ai të ketë shfrytëzuar besimin e tij për të rekruatuar persona të tjerë besimtarë, për ti përdorur më tej për qëllime terroriste?                                                     Besimi nuk duhet të ngatërrohet me dënimin. Nuk ka lidhje mes tyre, madje edhe gjykatat duhet të jenë të kujdesshme në këtë pikë. Personat të cilët janë besimtarë të një feje të caktuar, duhet të gjykohen të pa bazuar mbi këtë fakt. Nuk ka lidhje nëse je një besimtar musliman apo i krishterë. Duhet të ruhet respekti për çdo besim, që besimi të mos jetë pikënisja për një gjykim të njëanshëm.                                                                                               

Ç`farë do të kërkoni nga gjykata?                                                                                                                                               Pafajësi. Unë përfaqësoj në këtë proçes Verdi Moravën dhe klienti im është i pafajshëm. Hjatë kontrollit në banesën e tij nuk është gjetur asnjë element përfshirës.  Nuk do të pranohet asnjë akuzë që prokuroria ka ngritur ndaj të mbrojturit nga unë në këtë proces. /tesheshi.com/

.