reklama juaj ketu

Ç’ premton Kuvendi i ardhshëm i Kosovës? Legjislatura e kaluar, një tmerr!

Nga Blendi Gashi

Legjislatura e pesë e Kuvendit të Kosovës që u shpërbë pas rrëzimit të qeverisë “Mustafa”, vlerësohet si më e dobëta nga paslufta, ku roli i deputetit është degraduar tej mase.

Kjo legjislaturë, përveçse do mbahet mend si e gazit lotsjellës e fjalorit banal të deputetëve, njëherit do kujtohet edhe për faktin se një numër i madh deputetësh kanë qenë aty vetëm për rrogën pasi nuk e kanë hapur gojën pothuajse asnjëherë.

Dhe sipas raportimeve mediale, disa prej “memecëve” pritet të jenë sërish në lista zgjedhore si kandidat për të fituar një mandate të dytë. Dhe faji këtu padyshim se shkon tek vet partitë që kandidojnë figura të tilla.

Por duke parë se të gjitha partitë janë përforcuar me kuadro nga fusha të ndryshme, gara brenda tyre padyshim se do rritet, me shpresë që do kandidohen njerëz më të arsimuar dhe më të përgjegjshëm.

Andaj, duke parë blloqet e krijuara politike dhe pamundësinë që partitë të kandidojnë nga 110 emra si herave të kaluara, përjashtuar Vetëvendosje-n që do garojë e vetme, shtrohet pyetja nëse legjislatura e gjashtë do jetë më profesionale por edhe më e përgjegjshme karshi qytetarëve që i kanë votuar?

Artan Murati nga Instituti Demokratik i Kosovës, organizatë kjo që monitoron punën e Kuvendit, thotë se legjislatura e fundit la të pazgjidhura shumë probleme dhe njëkohësisht nuk shfaqi efikasitet në rolin mbikëqyrës dhe legjislativ të tij, andaj shton se deputetët e legjislaturës së re i presin një varg punësh, e mbi të gjitha kthimi i normalitetit të punës në Kuvend.

Sipas tij nuk pritet të ndodhin ndryshime të mëdha në Kuvend, pasi thotë se shumica e partive do të kandidojnë figurat më të njohura të tyre.

Përveç aderimeve të reja, persona të cilët me siguri do të përfshihen në listat e kandidatëve për deputet, risi tjera nuk besoj se mund të ketë sa i përket strukturave ekzistuese nëpër parti. Partitë do t’i kandidojnë personat më besnik dhe më të njohur të tyre. Fatmirësisht listat janë të hapura, dhe qytetarët kanë mundësi që direkt të zgjedhin përfaqësuesit e tyre në Kuvend. Shpresoj që legjislatura e radhës të jetë më e mirë se e kaluara”, tha Murati për tesheshi. com.

Edhe analisti politik Fadil Lepaja, beson se struktura e Kuvendit do të mbetet pak a shumë e njëjtë, efektiviteti do rritet por jo edhe cilësia.

Mendoj se LDK ka gjasa kualitativisht të dalë më e mirë. Koalicioni PDK ka ndryshime më tepër kozmetike përfshi edhe të tjerët. Vështirë të besohet se kjo sjell ndonjë kualitet të ri kur struktura dhe liderët mbeten të njejtë  përveçse kësaj radhe do të ketë dëgjueshmëri më të madhe të deputetve ndaj shefave të tyre. Aderime janë bazuar në këtë pike”, tha Lepaja për tesheshi. com.

Njohësi i rrethanave politike Ali Hertica, mendon se edhe legjislatura e ardhshme do ketë përafërsisht një pamje të njëjtë si e fundit, sepse sipas tij mbi 85% e kandidatëve për deputet janë fytyra të ricikluara.

Ardhja e deputetëve të ri nuk do ndryshon fare situatën politike, sespe ‘ujqit e vjetër’ ende sorlloatën nëpër parlament dhe të rinjtë do t’i bëjnë vetëm si lodra të tyre”, tha Hertica për tesheshi. com.

Kutjojmë se periudha e parë legjislative dhe ajo e dytë deri në vitin 2006 udhëhiqej nga Nexhat Daci, ndërsa Kolë Berisha udhëhoqi periudhën e dytë legjislative 27.03.2006 – 12.12.2007, në periudhën e tretë legjislative 13.12.2007 – 03.11.2010 ishte Jakup Krasniqi, i cili udhëhoqi dhe periudhën e katërt deri më 2014, si dhe e pesta drejtohet nga Kadri Veseli. /tesheshi.com/