BE delegon në Athinë menaxhimin e krizës: jep 700 milionë euro për refugjatët

Bashkimi Europian ka gati planin e ndihmës humanitare në favor të Greqisë. Për herë të parë që nga fundi i Luftës së Dytë Botërore Europa përgatit një plan të tillë ndërhyrjeje urgjente për të shmangur një tragjedi të vërtetë humanitare në territorin europian. Plani do të miratohet nga Komisioni Europian me firmën e presidentit Jean-Claude Juncker dhe përgjegjësit për ndihmën humanitare, qipriotit Christos Stylianidis.

idomeni

Plani parashikon shtatëqind milionë euro në tre vjet në favor të vendeve që gjenden në emergjencë për shkak të krizës së refugjatëve. Teksti i planit të ndihmës nuk citon në mënyrë specifike Greqinë por është e qartë se pjesa më e madhe e parave do të drejtohen pikërisht në Athinë. Për më tepër që në tekstin e marrëveshjes thuhet shprehimisht se ndihmat janë të destinuara për vendet që tashmë po përballen me një krizë të rëndë ekonomike që mund të përkeqësohet për shkak të fluksit të refugjatëve. Vetëm një pjesë e fondeve do të shkojë drejtpërdrejt për qeverinë Cipras për të financuar programe specifike mbështetjeje, ndërsa fondet më të mëdha do të jepen për OKB dhe organizata të tjera joqeveritare të pranishme në territorin grek e që po ndihmojnë në menaxhimin e krizës.

Nevoja e një plani ndihme për Greqinë ishte sjellë në vëmendje nga krerët e shteteve dhe qeverive gjatë samitit europian të 19 Shkurtit në Bruksel. Komisioni u vu në lëvizje me shpejtësi dhe tashmë miraton planin. Nga Janari 2015 kanë mbërritur më shumë se 1.1 milionë azilkërkues në territorin europian. Greqia është shndërruar në një qendër të vërtetë emigrantësh të cilët për muaj kanë kaluar Egjeun duke u nisur nga Turqia, kanë zbarkuar në ishujt grekë dhe sapo kanë dalë të mbërrjnë në pjesën kontinentale të Greqisë kanë nisur udhëtimin në rrugën ballkanike, drejt Austrisë, Gjermanisë dhe Zvicrës.

Por më pas, kufizimet e lëvizjes së lirë në zonën Shengen, kontrollet, pengesat, zbatimi i kuotave të pranimit nga disa vende e në fund edhe mbyllja e kufirit nga Maqedonia, kanë bërë që refugjatët të mbeten të bllokuar në Greqi. Kjo ka bërë që në vend të grumbullohet një numër i lartë refugjatësh, ndërkohë që vetëm gjatë dy muajve të këtij viti në vend kanë mbërritur 111 mijë persona. Me një situatë që duket qartë se do të shkojë drejt përkeqësimit, Greqia është përfolur se mund të nxirret fare jashtë zonës Shengen.

Për këtë arsye, Brukseli është i detyruar të përballet për herë të parë në historinë e vet me një situatë me pasoja humanitare katastrofike në brendësi të territorit të vet. Detyra është më e vështirë pasi dihet se Europa nuk e ka një instrument të përshtatshëm për t’iu përgjigjur situatës. Për këtë arsye, Brukseli pritet të ngrejë një mekanizëm të ri europian për menaxhimin e  krizës.

ref greece 1

Për të filluar projektin do të duhen 300 milionë euro në vitin 2016 dhe 200 të tjerë në vitet pasuese, 2017 e 2018. Paratë do të nxirren nga zëra të ndryshëm të bilancit të komunitetit dhe do të shkojnë për organizata të specializuara që tashmë punojnë në Greqi: UNHCR, Kryqi i Kuq dhe të tjera. Paratë do të shërbejnë për rritjen e kapaciteteve të strukturave të pritjes së refugjatëve, hapjen e qendrave të reja, pagesat e hoteleve ku do të strehohen një pjesë e refugjatëve. Dhe për më shumë, do të ketë fonde për të shpëtuar jetët njerëzore, lehtësimin e vuajtjeve dhe ruajtjen e dinjitetit njerëzor me programe arsimimi, shërbime, ujë, mjekime dhe programe sanitare.

Me pranverën që po troket, e me fluksin e destinuar të rritet, Brukseli do tu kërkojë qeverive anëtare të bllokut të japin me shpejtësi miratimin që të mund të ndërhyhet sa më shpejt të jetë e mundur. Kërkesa do të shkojë edhe për ato qeveri duke nisur nga lindja, që me egoizmin e tyre kanë penguar bllokun të arrijë një marrëveshje për menaxhimin e përbashkët të krizës, e që bënë të mundur sakatimin e marrëveshjes së Shengenit dhe përshkallëzimin në limit të situatës së refugjatëve në Greqi. Gjithsesi, i sigurtë mbetet vetëm bashkëpunimi i vendeve që drejtohen nga qeveri socialiste, pasi grupi i këtyre partive prej kohësh ka kërkuar të ndërhyhet për gjendjen humanitare në Greqi. Përgatiti: Juli Prifti – /tesheshi.com/

auto pjese dak

Related posts